Yon peyi kote nou tout ka viv
Lib e libè
Kote lavi moun ka respekte
Kote tout moun ka travay
Timoun al lekol
Kote ki genyen bon jan swen sante
Li mande sakrifis
Anpil sakrifis
Genyen ki vlel nan bouch
Genyen lòt ki mouri deja pou li
Chanjman nou vle a
Mande pou pale saw wè
Pouw di saw panse epi montre saw kwè
Li mande pou respekte moun
Pouw asepte peye saw dwe
E respekte dwa lòt laaa
Pou tout moun genyen menm dwa
Pou genyen jistis
Pou pa genyen plas pou abi
Pou bouwo jodi pa tounen viktim demen
Pou viktim jodi pa tounen bouwo demen
Li mande pou bani divizyon
Sispann divèsyon ak egoyis
Rekonèt diferans nou
Aksepte yo e tolere yo…
Chanjman nou vle a
Desalinn te vlel anvanw
Li mouri pou li
Anpil gentan pase
Timoun, jèn moun granmoun
Anpil vi gaspiye…
Chanjman nou vle a
Lap vini, lap vini kanmenm
Anpil nan nou swetel
Pifò nan nou pap wèl
Men siw genyen chans pou wèl
Bat pou meritel…!
Camille EDOUARD, Jr.
